(東方日報專訊)Beyond黃家強與黃貫中廿三年兄弟情反目，冰凍三尺非一日之寒，家強首度開腔為自己平反，細數五年來的屈辱和Beyond拆夥內情，更力數阿Paul四宗罪，他多次重申：「容忍係有限度！」
早前家強、Paul和朱茵在頒獎禮上同場碰頭，二人互當透明，火藥味濃，句句有骨落地。昨晚家強在旺角band房接受訪問。
黃：黃家強 記：記者
記：當晚有冇同Paul打招呼？
「當我透明」
黃：無，我好，呢四、五年嚟我每次同佢打招呼、主動同佢講嘢，佢都不瞅不睬當我隱形，容忍係有限度！05年Beyond拆夥，係Paul首先提出，阿榮（葉世榮）問點解，佢話「環球」唔簽Beyond，唱片公司只肯要佢一個，佢要單飛。講到咁，仲有咩好講?!我同阿榮就咁做咗兩年孤兒仔。我唔信冇人肯簽Beyond，淨係要佢一個？咁都傾到，佢真係好叻仔囉！以前佢同阿榮出去傾嘢，我主力做歌，自問好畀心機做好本分，一心諗住隊band夾到天荒地老，冇計較邊個紅啲、着數啲，做兄弟要同甘共苦，85年識佢到依家搞成咁，好心噏！
記：Beyond重組機會渺茫？
黃：我唔想夾硬嚟，夾band講交流，做得番朋友先算啦！
記：你哋反目事關03年，Paul同朱茵去泰國旅行行蹤被洩，二五仔矛頭直指係你？
黃：Paul根本冇講我知佢哋去邊，佢知道唔關我事，但佢唔講唔澄清我都冇符！05年Beyond最後演唱會開會，佢直頭當我透明。
派帖被侮辱
記：好兄弟搞成咁好可惜？
黃：好兄弟……我估佢唔係咁諗，佢收埋太多嘢喺心，同台做騷亦冇癮。前年我結婚派帖請佢嚟飲，佢唔嚟仲同記者講：「我要去北京幫隻狗搵老婆！」咩意思？好侮辱，容忍有限度，唔交往亦唔使咁！
黃：睇見「溫拿」34年合作無間，我好羨慕。舊年我簽了一隊新band，亦有將Beyond經驗傳授。我同佢哋講，夾band最緊要團結，唔可以有個人主義，分工合作，唔好偏重某一兩個人，更加唔好諗住自己跑出就飛起其他人。
此外，日前家強接受無綫娛樂新聞台《范後感》訪問時大晒幸福，並公開手機內囝囝可愛照片，又自爆靠秘密飛抵日本陪老婆探家人而奪芳心，最意想不到是在日本擺酒時要公開每圍酒席價錢。
| |
|
